Saltangará

Saltangará liggur sunnarlaga á eystara armi á Skálafjørðinum, sum úr útsynningssíðuni klívur syðra part av Eysturoynni í tvey.

Sereyðkenni:
Saltangará ella Heiðarnar, sum staðið eisini verður kallað, liggur við sjóvarmálan í blíða heiðalendinum sunnarlaga á Eysturoynni. Bygdin er niðursetubygd frá 1846, sum í dag er vaksin saman við grannabygdunum Glyvrar og Runavík til eitt samanhangandi 10 km langt bústaðarøki.

Handla hevur verið í Heiðunum síðani 1866, tá Gamli Handil lat upp og nógv virksemi hevur verið her gjøgnum tíðirnar, bæði á sjógvi og landi. Størsti parturin av handils- og mentanarlívinum í Eysturoynni heldur til í økinum og her eru bankar, posthús, kunningarstova umframt fleiri matstovur, caféir og rúsdrekkasøla.

Skálafjørður er landsins størsta og tryggasta natúrhavn og nógva virksemi gjøgnum tíðirnar hevur ment vinnuna í økinum. Lívligt er á havnarlagnum, har stórt virksemi er innan ali- og fiskivinnu, supplytænastu til oljuvinnuna, smábátahavn eins og útlendsk ferðamannaskip javnan leggja at at vitja náttúruvøkru oynna.

 

 Friðsæla

  • Sita millum neystini í fjøruni og eygleiða, hvussu skiftandi ljósið spælir sær í sjónum, ið myrknar og rísnar ella slætnar til blikalogn ann uppá veðrið og rákið.
  • Liggja fram eftir rommum í bønum omanfyri bygdina og síggja fjøllini speglast í blankastilla fjørðinum.
  • Taka seg berføtt fót fyri fót niðan brekkuna móti Høgaleiti at hoyra heiðafuglin láta í kvirruni.

 

 

Myndafólk: Natúrlist v/Anette Sonne

Saltangará

Líknandi