Í nógv ár ynsktu fólk í Nes kirkjusókn at fáa eina nýggja kirkju, av tí at gamla kirkjan var vorðin ov lítil.

Í 1983 varð kirkjuskattur innførdur í sóknini og allur peningurin fór til at byggja nýggja kirkju fyri.

Ein arkitektakapping varð hildin. Millum tey 29 uppskotini, sum komu inn, var tað Høgni W. Larsen, arkitektur, ið vann. Dómsnevndin metti uppskotið hjá Høgna at vera stílreint og í tráð við gamlan føroyskan byggisið.

Í 1992 var farið undir at byggja kirkjuna. Hesi árini vóru merkt av fíggjarkreppu í Føroyum, og tí var trupult at savna pening at byggja fyri. Tað var at kalla einans fólk úr kirkjusóknini, ið luttók í byggingini. Alt arbeiðsfólkið lat 20% av síni arbeiðstíð ókeypis til byggingina. Fyrisitingin var eisini ókeypis, og byggingin varð soleiðis væl bíligari, enn hon annars hevði verið.

Fyrsta sunnudag í advent, tann 27. november 1994, varð kirkjan vígd. Umleið 1000 fólk vóru til vígsluna.
Kirkjan rúmar 400 fólkum í skipinum og 100 fólkum á loftinum. Hølið kann eftir tørvi skildrast sundur við faldihurðum til smærri høli, ið verða nýtt til konfirmantafyrireiking, sangvenjingar og hugnaløtur í sambandi við kirkjulig tiltøk.

Kirkjan fekk navnið Fríðrikskirkjan eftir Fríðriki Petersen. Hann varð borðin í heim í Saltnesi í 1853, og var próstur á Nesi frá 1900 til 1917. Fríðrikkur var dugnaligt skald, og millum kendastu sálmarnar hann yrkti, eru “Gleðilig jól,” og “ Tíðin rennur sum streymur í á”. Eisini týddi hann “Faðir vár” til føroyskt. Fríðrikskirkjan varð bygd á Heygum, oman fyri fýrin á Garðsenda. Har sæst og hoyrist hon um nærum alla kirkjusóknina, og stendur sum eitt eyðkennismerki fyri økið.

Kelda: folkakirkjan.fo

Samband: +298 448476 ella nes(at)kirkja.fo

Opið eftir avtalu.

Kirkjugongd: Sunnudag kl. 11.00.

Les meira her