Funnings kirkja stendur út móti sjónum, á staðnum kallað Niðri á Hólma. Undan hesa hava fýra, møguliga fimm, kirkjur staðið. Kirkjan bleiv vígd í oktober 1847.

Í 1845 varð gamla kirkjan sýnað. Hildið var, at kirkjan var í so vánaligum standi, at hon átti at verið tikin niður. Harafturat var hon ov lítil til kirkjufólkið. Tann gamla kirkjan var 60 fermetrar meðan nýggja kirkjan er 87 fermetrar, og sostatt væl størri.

Funnings kirkja og Porkeris kirkja eru tær yngstu av kirkjunum, ið vanliga verða nevndar tann gamla føroyska bygdakirkjan, sum enn standa uppi. Eyðkennið fyri hetta slagið av kirkju er, at hon hevur lága grund, tjøraðan klædning, hvít vindeygu og flagtekju. Bæði Funnings- og Porkeris kirkja eru bygdar í 1847. Ætlanin var at byggja kirkjuna ári fyri, men meslingar gjørdu um seg, fólk doyðu, og byggingin bleiv útsett.

Hildið er, at núverandi kirkjan er tann fyrsta, sum hevur havt timburklædning, og møguliga eisini tann fyrsta við torni. Kirkjan er sera vøkur innan við berum viði og træskurðum. Útskorni træveggurin millum kórið og kirkjuna, og framman fyri altarið og sakristiið, minnir um ikonveggir í ortodoksum kirkjum. Súmbolini eru tó onnur. Smiðirnir, ið bygdu kirkjuna, skóru og evnaðu hesar træskurðir. Í kirkjuni er ómálaður Kristusfigurur frá kirkjuni, sum varð bygd umleið 1690. Søgan sigur, at figururin rak á land ósanum niðan fyri kirkjuna.

Kelda: folkakirkjan.fo

Upplatingartíðir:
Opið mánadag og hósdag frá kl 12:00 – 14:00
Samband: + 298 268419 ella funnings(at)kirkja.fo

Kirkjugongd: Sunnudag kl.11 í summarhálvuni (onkuntíð, um prestur er, verður guðstænastan flutt til kl.11.30), og í  vetrarhálvuni kl.12

Les meira um kirkjuna í Funningi HER 
Les meira um Funning HER